تحدي منتجات ٢٠١٨ | شهر: يناير، فبراير. مارس

مساء / صباح الخير ..

السنة هذي بدأت في تحدي مع نفسي في استخدام منتجات العناية، الفكرة بدأت من المدوِنة حنان صاحبة مدوَنة Chat With Hanan  الصراحة انصدمت من كمية المنتجات اللي ممكن نخلصها خلال فترة ثلاثة شهور لو ركزنا فعلًا على استخدامها هي فقط، مشكلة كثير مننا نشتري ونستخدم الين نوصل النص او أقل نمل ونترك المنتج ونروح نفتح منتج جديد أو ممكن حتى نشتري منتج جديد ونكدس منتجات، بكذا يكون اهدار لفلوسنا وفوضى في دروجنا. 

 

 

أول منتج خلصته هو صابون الجسم الأسود الأفريقي، يحتوي على الألوفيرا والقمح وفيتامين E وفيه داخله حبيبات للتقشير باينه في الصورة، الصابون هذا مشهور جدًا وناس كثير تكلمت عنه، طلبته من ايهرب وصراحة يستاهل كل فلس اندفع فيه، مايجفف البشرة هذا اهم نقطة بالنسبة لي بعد التنظيف، وريحته تجيب العافية برجع اشتريه اكيد. 

تونر ماء الورد من ايهرب، المعروف لا يعرف، خفيف على بشرتي ( مختلطة مائلة للجفاف / حساسة ) رجعت شريته، سعره كويس وكميته كبيرة. 

لوشن نيفيا بزبدة الشيا للبشرة الجافة، عرفته من البلوقر أبرار، وصرت كل ما خلصت علبة شريت علبة ثانية، أحس ظلم ينكتب عليه لوشن، ترطيبه أقوى من كلمة لوشن، وريحته حلوة. 

مزيل المكياج من جارنييه، فيه أحسن منه ماراح ارجع اشتريه. 

مزيل المكياج من محل اتش اند أم، يتكون من طبقتين سائلة + زيتية، ممتاز على سعره بعد التخفيض لو بدون ماراح اشتريه. 

مزيل مكياج العيون من نيفيا، أحبه ودايم ارجع اشتريه، يذوب الماسكرا الواتربروف بسرعة ومايحسس عيوني، بالنسبة لي أفضل من الاثنين اللي قبله بمراحل. 

غسول الوجه من يوسرين للبشرة الجافة الحساسة، اخذته من ايهرب وصار له فترة دايم مخلص من الموقع فـ طلبت لي غسول غيره لكن مايجي ولاشي من هذا، ينظف ومايجفف مو قوي على البشرة ولا يحرقها، ومايترك احساس الصابون اللي يزلق كذا على البشرة مثل باقي غسولات البشرة الجافة. الحمدلله رجع توفر ورجعت طلبته.

كحل سائل من بورجوا فرشاته رفيييعة، اتوقع الآن تغير شكل الباكيج، صار له زماان عندي ولا تغير، حقيقي كان عاجبني بس صار لازم اتخلص منه لان طوّل وهو مفتوح.

ماسكرا من اسينس، من مفضلاتي وكل ماخلصت ارجع اشتريها، تغني عن تركيب الرموش، مرات تتكتل لان كمية المنتج كبيرة، بس يبيلها تعوّد وتضبط معاك، رخيصة جداً. 

سيروم للتحكم بالمسامات اعتبره حل مؤقت، قبل المكياج يضيق المسام ويشد البشرة شوي. مالقيت معاه نتيجة دائمة أو جبارة.

كريم ترطيب الوجه من كلينيك للبشرة الجافة، ممتاز أحبه ورجعت شريته كم مره، اللي بشرتها تشقق الفونديشن تاخذه، لكن ما افكر اشتريه حالياً. 

ماسك النوم باللؤلو من سيفورا، أقل من عادي، والتعليب ماعجبني كمية المنتج كبيرة على استخدام مره وحده، والعلبة اذا انفتحت خلاص ماتتقفل ١٠٠٪، يعني شغله. 

هذا للأسف مقلب، ما فادني بشي مع ان اللي مسوقته لي حتى فحص بشرة سوت لي واشغلتني الين اشتريته، ريحته قفص طيور ولا يفتح الآثار مثل ما قالت ولا شفت منه نتيجة، وسعره مو شوي.

كريم يفتح البشرة، يفتح فعلاً لكن لا تعتقدين انه سحر، راح ترجع بشرتك للونها لو كانت متأثرة من الشمس مثلاً، الاثار القديمة والجديدة بيخففها بكم درجة فقط.

كريم اللوز من ذا بودي شوب، ريحته تزعجني لكن تختفي بعد فترة، فعال في الترطيب، بس يعني ممكن تلقون كريمات مثل مفعوله او افضل بسعر اقل. 

بلسم ما يغسل من الشعر، اللي شعرهم يتشابك وينفش راح يحل لهم أزمة عظيمة، قوامه مائي شوي مو كريمي وفيه منه نوع ثاني بخاخ، الصراحة ما اقدر امشط شعري بعد الشاور بدونه. 

شاور سوك من مجموعة اليوتيوبر زويلا، ريحته تجيب العاافية، الصراحة استخدمه لتنقيع الاقدام قبل العناية. 

جل معالج اثناء النوم، عندي حبتين سامبلز، عادي ماشفت منهم شي يذكر.

هذا المنتج صورته اختفت فجأة، لكن والله ما اخليه هو احسنهم كلهم هههه، ماسك للشعر، شي خيالي بالنسبة لشعري يخلي الشعره رطبة وثقيلة وناااعمة يعني كذا يعطيها حياة، ما ابالغ يمكن هذي العلبة الثالثة او الرابعة اللي اشتريه واخلصه، من ايهرب. 

 

واخيراً خلص هالبوست، مدري ليش حسيته مستحيل يخلص من كثر المعوقات اللي صارت له هههههه

اشوفكم على خير بتدوينة جديدة 

 

 

 

 

 

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

http://www.hloombloom.com/wp-content/plugins/wp-monalisa/icons/wpml_bye.gif 
http://www.hloombloom.com/wp-content/plugins/wp-monalisa/icons/wpml_good.gif 
http://www.hloombloom.com/wp-content/plugins/wp-monalisa/icons/wpml_negative.gif 
http://www.hloombloom.com/wp-content/plugins/wp-monalisa/icons/wpml_scratch.gif 
http://www.hloombloom.com/wp-content/plugins/wp-monalisa/icons/wpml_wacko.gif 
http://www.hloombloom.com/wp-content/plugins/wp-monalisa/icons/wpml_yahoo.gif 
http://www.hloombloom.com/wp-content/plugins/wp-monalisa/icons/wpml_cool.gif 
http://www.hloombloom.com/wp-content/plugins/wp-monalisa/icons/wpml_heart.gif 
http://www.hloombloom.com/wp-content/plugins/wp-monalisa/icons/wpml_rose.gif 
http://www.hloombloom.com/wp-content/plugins/wp-monalisa/icons/wpml_smile.gif 
http://www.hloombloom.com/wp-content/plugins/wp-monalisa/icons/wpml_whistle3.gif 
http://www.hloombloom.com/wp-content/plugins/wp-monalisa/icons/wpml_yes.gif 
http://www.hloombloom.com/wp-content/plugins/wp-monalisa/icons/wpml_cry.gif 
http://www.hloombloom.com/wp-content/plugins/wp-monalisa/icons/wpml_mail.gif 
http://www.hloombloom.com/wp-content/plugins/wp-monalisa/icons/wpml_sad.gif 
http://www.hloombloom.com/wp-content/plugins/wp-monalisa/icons/wpml_unsure.gif 
http://www.hloombloom.com/wp-content/plugins/wp-monalisa/icons/wpml_wink.gif